Til hamingju, Ísland! – Rúmlega 95% segja NEI við Icsave-ólögunum!

Í öllum kjördæmum er sigurinn algerlega afgerandi.

Niður með Jóhönnu!

Niður með Icesave-flokkana!

Burt með brezku krumluna af íslenzku samfélagi.

Burt með AGS!

Fylgjum nú sigrinum eftir með því að afnema 28. ágúst-ólögin líka!

Spunakonan Jóhanna er byrjuð að reyna að krafsa í bakkann – og vitaskuld Steingrímur líka. Hann er svo ósvífinn að halda því fram, að enginn hafi reynt að fá menn til að kjósa já. Samt lýsti hann því sjálfur yfir, að hann ætlaði að segja já! Vissi hann þá, að hann er fáum mönnum eða engum fyrirmynd lengur?!

Ómarktæku skötuhjúunum óskum við þess, sem þau hafa verðskuldað: valdamissis og sneypu. Þau geta farið að skrifa ævisöguna sína í fyrramálið.

Heyr fyrir íslenzkri þjóð! Nú fáum við líka fleiri þjóðaratkvæðagreiðslur! Látum ekki spillta stjórnmálastétt og rotna stétt fjármálafursta leiða okkur lengur á helferð sinni. Hlutföllin í dómadags-endemis-ábyrgðarleysi þeirra sjáum við í því, að tapaðir fjármunir á vegum Jóns Ásgeirs og hans fyrirtækja nema tvöföldum þeim fjárhæðum sem tjónið af völdum jarðskjálftans í Chile hljóðar upp á!

Steingrímur "sá ekki tilgang í því" að fara á kjörstað! Hann er nógu ruglaður til að endurtaka það í 10-fréttum! Hann gerir lítið úr kjörsókninni – þótt Sigmundur Davíð hafi bent á hið gagnstæða! – og segir (já, auðvitað er ég að tala um steingervinginn), að ef talað hefði verið fyrir jái, þá hefðu fleiri sagt já!

Jóhanna segir Icesave-málið "bara treysta bönd ríkisstjórnarinnar"! Eigum við að leyfa þessu vanhæfa gengi það?!

1,6% hefur sagt já, 93,6% sagt nei, auðir og ógildir seðlar: 5,2%, segir fréttaþulur Sjónvarpsins kl. 22.23. Af þeim, sem greiddu annaðhvort já- eða nei-atkvæði, sem talin hafa verið, sögðu 1,69% já, en 98,31% glymjandi NEI.

Og þetta eru lögin (ólögin) sem ríkisstjórnin barðist fyrir eins og vargur í vetur! 

Til hamingju, íslenzka þjóð! 

Mætum öll á þjóðhátíð á Austurvelli vegna kosninganna á morgun!

Kröfuganga hefst frá Hlemmi kl. 14, útifundurinn kl. 15, með þátttöku margra hópa. Meðal þeirra sem útbjuggu sér kröfuspjöld vorum við allmörg úr nýjum samtökum: Þjóðarheiður – samtök gegn Icesave hafna öllum samningum um það mál, við viljum engar málamiðlanir við gömlu, ofríkisfullu nýlenduveldin Bretland og Holland, enda er Icesave-deilan lagalegt, ekki milliríkjapólitískt mál í eðli sínu. Sem lagaleg deila varðar hún kröfurétt og ábyrgð einkafyrirtækis, ekki ríkisins, og hún varðar Tryggingasjóð innstæðueigenda og fjárfesta, sem er sjálfseignarstofnun á framfæri banka og fjármálastofnana, ekki ríkisfyrirtæki. 

Þetta á m.a.s. Jóhanna Sigurðardóttir að vita, þrátt fyrir merkilega fáfræði sína á ýmsum sviðum, því að hver var það önnur en hún, sem 1999 bar fram breytingartillögu við frumvarpið um tryggingasjóði, sem innleiddi hér það tilskipunarákvæði Evrópubandalagsins, 94/19/EC, sem gerir íslenzka ríkið og þjóðina laus við alla fjárhagsábyrgð á Icesave-reikningunum?. Og út á hvað gekk breytingartillaga Jóhönnu? Jú, út á það að gera innistæður í íslenzkum bönkum RÍKISTRYGGÐAR! En hvernig stóð á þeirri tillögu hennar, ef tilskipunin sjálf og lagafrumvarpið gerðu sjálf ráð fyrir ríkisábyrgð?!

Svarið er einfalt: Enga ríkisábyrgð var þar að finna – og meira en það: Slíkt ákvæði er þar hvergi að finna, enda var þessi tillaga Jóhönnu felld á þinginu! – Samt hefur hún barizt fyrir því eins og óð valkyrja, sem bítur í skjaldarrendur, að láta leggja slíkar ríkisábyrgðir – meiri en hana hefur órað fyrir árið 1999 – á herðar íslenzkra launamanna!

Fjöldinn allur af erlendum sérfræðingum, ritstjórum viðskiptablaða, lögfræðingum og öðrum fagmönnum, auk okkar eigin færustu lögspekinga, taka afstöðu með okkur Þjóðarheiðursmönnum í þessu máli. VIÐ EIGUM EKKI AÐ BORGA er rétta svarið, og vextir af 0 krónum eru vitaskuld 0 krónur.

Engar málamiðlanir! Rétti menn óvininum litla fingurinn, reynir hann að taka alla höndina. Þannig hefur farið um þetta mál: Um leið og Bretum og Hollendingum var réttur fingurinn með það að fara að semja við þá, hófst togstreitan við þá – reiptog sem enn stendur yfir í London, í stað þess að við eigum að sleppa reipinu og láta þá falla aftur á bak á óæðri endann við fullkomna sneypu.

Stöndum vörð um mannréttindi, sakleysi íslenzkrar þjóðar í máli þessu, lögvarinn rétt okkar og heiður. Tökum þátt í því með fjöldamótmælum á morgun að berjast á móti spillingu í fjármálalífi landsins, harðri aðför bankanna að heimilum launafólks, linkind við glæpsamlega útrásarvíkinga, samningskrulli við þá að fá aftur eignarhald sitt á stórfyrirtækjum og að endingu gegn smánarsamningum við yfirgangssamar ríkisstjórnir, sem eiga hér ekki heimtingu á neinu!

Fögnum þessari þjóðaratkvæðagreiðslu sem tækifæri til að tjá vilja þjóðarinnar, til að senda skilaboð um allan heim, að við ætlum ekki fjölskyldum okkar og börnum að borga fyrir skuldir einkafyrirtækis.

Ég verð með erindi í Útvarpi Sögu um þessi mál kl. 12.40–13.00 í dag.

Alþingi götunnar stofnað á Austurvelli

Mikil mildi, að hálft tonn fannst af sprengiefni

Að mennirnir, sem flúðu af vettvangi, þar sem hálft tonn fannst af sprengiefnum og -búnaði í V-Portúgal, töluðu spænsku, bendir til ETA-hryðjuverkasamtakanna fremur en öfgamúslima. Nærri fundarstaðnum er hafnarbærinn Peniche. Blóðþyrst öfl þessarar róttæku aðskilnaðarhreyfingar Baska hafa nú þegar 828 mannslíf á samvizkunni. Slík samtök ber að uppræta eins og krabbamein í samfélaginu, en jafnframt að sýna íbúum Baskalands, að almenn mannréttindi séu þar ekki aðeins virt, heldur gert vel við þann þjóðflokk með sértækum aðgerðum, svo að hvöt finni sem fæstir til að sameinast siðlausum öfgahópum.

Hér má svo minnast þess til gamans, að fyrsta orðabók á Baskamáli er frá Íslandi – orðasafn sem tekið var saman til að auðvelda samskipti við baskneska sjómenn sem sóttu hingað á Íslandsmið.

PS. Kortið með fréttinni er unnt að zúmma inn til að skoða betur staðhætti. 

Hálft tonn af sprengiefni finnst í Portúgal

Andstæður og öfgar magnast í Danaveldi

Harðir eru þeir hjá Danska þjóðarflokknum að vilja banna erlend tungumál í bæði kennslustundum og frímínútum í grunnskólum Danmerkur. "Flokkurinn leggur til, að nemendur, sem brjóta bannið, verði látnir sitja eftir eða ávíttir á fundi með foreldrum," segir í frétt Mbl.is. Hræddur er ég um, að það kyndi bara enn frekar undir uppreisnaranda sumra múslima og fleiri hópa innflytjenda, en Marlene Harpsöe, talsmaður flokksins, réttlætir þetta með því, að það vinni gegn einelti. 

Ljóst er fyrir löngu, að Danir gengu allt of hratt fram í því að opna landið fyrir innflytjendum. Innfytjendastefna ætti að miðast við, að þjóðin, sem fyrir er, njóti góðra áhrifa hennar fremur en að jafnvægi raskist í samfélaginu. Aðhæfing innflytjenda að þjóðlífi, vinnumarkaði og menningu landsins er þar höfuðatriði. Það er að fara fram úr sér með hættulegum afleiðingum á þessu sviði, að innflytjendastraumur gangi hraðar fram og sé meiri en svo, að við verði ráðið að kenna öllu því fólki þjóðtungu viðkomandi lands með viðhlítandi hætti og gefa þar öllum færi á fullu starfi eða menntun.

Ég verð með erindi í Útvarpi Sögu kl. 12.40 í dag, fjalla um þjóðfélagsmálin!  

Vill banna erlend tungumál

Nákvæmnisfræði Eiríks Tómassonar ná nýjum hæðum

Spunafræði stjórnspekinga vestur á Melum virðast ná nýjum hæðum hjá il professore Eiríki Tómassyni, þetta er greinilega orðin mikil eksakt-videnskab hjá manninum, og væntanlega á hann eftir að gjöra það heyrinkunnugt á fréttamannafundi nú í hádeginu, nákvæmlega klukkan hvað í dag – svo sem til dæmis kl. 14.47:15, plús eða mínus 1–2 mínútur – umþóttunartími forsetans til að ákveða sig renni út samkvæmt stjórnarskránni, og þá er eins gott að virðingarmaðurinn fari nú að leiðsögn vísindamannsins til að forðast stjórnarskrárbrot!

Hafi Eiríkur fengið þyngra hlutverk en þetta verk forsetans, mætti hann gjarnan upplýsa okkur fáfróða um það í sama fréttatíma. En merkilega undarleg þótti mér niðurstaða hans og annarra, sem fengnir voru til að gefa frumvarpinu stjórnarskrárlegan gæðastimpil, því að ég hélt alltaf með ýmsum lögspökum, að framsal dómsvalds í mikilvægu máli til útlendinga væri klárt stjórnarskrárbrot, sér í lagi þegar það er ekki til alþjóðlega viðurkenndra mannréttindadómstóla, heldur til sérhyggjudómstóls Englendinga, sem eiga hagsmuna að gæta, en fengju nú vald til að úrskurða um alíslenzk gjaldþrotaskiptalög.

Eins sýnist mér og glöggum lögfræðingi á Alþingi það vera stjórnarskrárbrot að búa til fjárskuldbindingu íslenzka ríkisins EFTIR Á, þegar ekki var nein gjaldskylda fyrir (sbr. HÉR!). En lögspeki Eiríks er líklega sveigjanlegri í þessu efni, og lýsir það vitaskuld afar mikilli tillitssemi, en við hvern eða hverja, geta menn svo velt vöngum yfir.

En sendum þeim Melamönnum hjartnæmt þakklæti okkar fyrir þeirra miklu hugsun.

Menn geta annars líka lesið þetta í blálokin fyrir ákvörðun forsetans: Ragnar H. Hall hrl.: Er rétt að samþykkja þetta frumvarp?

Jaðrar við stjórnarskrárbrot

Tímabær tillaga Péturs Blöndal

Allir sem virða þjóðarviljann hljóta að styðja tillögu Péturs Blöndal um þjóðaratkvæðagreiðslu, verði Icesave-álögurnar hrikalegu (100 millj. á dag!) samþykktar af naumum meirihluta þingmanna. Vitaskuld á þjóðin að fá tækifæri til að kjósa um Icesave. Í grein með þeirri yfirskrift rakti ég 8 helztu röksemdir fyrir þessu. En takið eftir, lesendur góðir, hvernig þingmenn stjórnarflokkanna greiða atkvæði um þessa breytingartillögu!

Tillaga um þjóðaratkvæðagreiðslu

Engum sæmandi að verja árásir á lögregluna í 'búsáhaldabyltingunni' – Hrikaleg frásögn af atburðum – Grunur á tveimur í ráðherrastóli

  Áhrifarík var grein Gylfa Guðjónssonar í Mbl. í fyrradag: Lögreglan í herkví. Það var skelfilegt þegar múgæsing æstustu mótmælenda tók út yfir allan þjófabálk, með limlestingum og ógnunum við laganna verði og starfsmenn Alþingis, þegar fjöldamótmæli voru við þinghúsið fyrir um ári og um sama leyti við Stjórnarráðshúsið.

Frá þessu segir Gylfi, sem sjálfur er ökukennari og fyrrverandi lögreglumaður, með eftirminnilegum hætti í Morgunblaðinu þriðjudaginn 8. desember.

Hér birtist nú sá hluti greinar hans, sem um þetta fjallar (en annar mjög áhugaverður hluti hennar ber yfirskriftina Hvað gagnast lögbrjótum?). Gefum Gylfa orðið, þetta verður þjóðin að sjá:

• HINN 8. desember fyrir ári var gerð árás inn í Alþingishúsið um bakdyr sem eru andspænis Dómkirkjunni. Þessari hrottalegu árás sem þarna fór fram hafa ekki verið gerð mikil skil í fjölmiðlum. Þetta var um kl. 15:00, þingfundur í gangi og ásamt starfsfólki þingsins var á vakt lögreglumaður Alþingis. 
• Ungur maður knúði dyra á bakdyrnar og starfsmaður opnaði. Um leið sá hann til hóps fólks sem hljóp að dyrunum, hann reyndi að læsa á ný en aðkomumaðurinn ruddi honum frá og réðust um 35 manns á þessa tvo þingverði sem þarna voru. Lögreglumaðurinn var uppi á þingpöllum, er hann varð áhlaupsins var og setti þegar af stað viðvörunarkerfi til lögreglustöðvarinnar. Hann fór síðan inn á stigaganginn þar sem átökin áttu sér stað, en frá honum lágu dyr að þingsölum á 2. hæð og áhorfendapöllum á 3. hæð. Honum tókst að hefta för hópsins á annarri hæð með eina kylfu og piparúða að vopni. 
• Starfsmenn þingsins voru neðar í stiganum í vörn sinni; þeir unnu ákveðna hetjudáð en þeir eru ekki þjálfaðir til átaka. Lögreglumaðurinn gat ekki beitt piparúðanum vegna þrengslanna og hætt á lömun starfsliðsins. Það tók lögreglumenn frá lögreglustöð nokkurn tíma að ná brjáluðu árásarfólkinu út úr stigaganginum, þá höfðu starfsmennirnir tveir ásamt lögreglumanninum varist og barist við ofureflið í um 15-20 mínútur. Enginn komst inn í þingsalinn en einn árásarmaður slapp upp á þingpalla, þar sem lögreglumaður þingsins yfirbugaði hann. 
• Eftirmálin eru að kona, starfsmaður Alþingis, slasaðist á baki eftir að henni hafði verið hent á ofn, hún hefur gengist undir aðgerðir en ekki náð sér. Lögreglumaðurinn slasaðist á hálsi, fæti og hendi og hefur ekki enn náð fullum bata. Þessi mál eru nú fyrir dómi. 
• Það merkilega við þetta mál var það, að þessi árásarhópur hafði efnt til uppþota og árása við Alþingishúsið bæði fyrir þennan atburð og framyfir áramót, til eru bæði sjónvarpsmyndir og ljósmyndir af viðburðum. – Enn merkilegra er að bæði núverandi heilbrigðisráðherra og fjármálaráðherra munu hafa haft það við að veifa til þessa hóps út um glugga þinghússins og utandyra að hvetja fólk þetta til dáða í stórhættulegum athöfnum og afbrotum. Margir lögreglumenn gengu frá þeim leik slasaðir og niðurbrotnir. (Greinaskil og skáletrun mín, jvj.)

Hér geta menn nú staldrað við og í 1. lagi þakkað forsjóninni, að ekki fór enn verr, því að stutt getur bilið verið milli lífs og dauða, þegar fólki er hent á miðstöðvarofn, rétt eins og þegar varpað var gangstéttarhellum í lögreglumenn við Stjórnarráðið á sama tímabili.

Í 2. lagi er ljóst, að við slíkt ástand verður engan veginn unað, og ættu menn að sameinast um að láta af allri réttlætingu þess ofbeldis mótmælenda sem átti sér stað á grófustu stundum 'búsáhaldabyltingarinnar'.

Í 3. lagi verður lögreglan að vera bæði nægilega vel skipuð og öryggi hennar tryggt í krafti fullnægjandi varnartækja hennar og valdsheimilda. (Hér skal þó aldrei stungið upp á svipuðum valdsheimildum og þeim, sem Evrópubandalagið mun hafa tryggt sér með því að heimila í raun dauðadóma á staðnum yfir grófustu uppivöðsluseggjum.)

Þá birtist í sama blaði daginn eftir, 9. des., forsíðufrétt um afleiðingarnar af þessum árásum á lögregluna. Ágrip af henni á Mbl.is er mjög fróðlegt, rétt eins og þessi merkilega grein Gylfa hér fyrir ofan, en HÉR er fréttin þó ýtarlegri:  

• AÐ MINNSTA kosti níu lögreglumenn hafa gert eða munu gera kröfu um bætur vegna áverka sem þeir hlutu við löggæslu á meðan á mótmælum og óeirðum stóð í miðborg Reykjavíkur í fyrravetur. Einn lögreglumaður hefur þegar fengið metna varanlega örorku en eftir á að meta endanlegt tjón þess sem hlaut hvað alvarlegustu áverkana.

  Gylfi Thorlacius, lögmaður Landssambands lögreglumanna, er með mál níumenninganna en segir að vel geti verið að fleiri lögreglumenn krefjist bóta.

  Í einu málanna sem Gylfi hefur á sinni könnu hlaut lögreglumaður varanlega örorku en Gylfi taldi ekki við hæfi að gefa upp örorkuhlutfall hans enda um einkamálefni að ræða. Lögreglumaðurinn sem um ræðir er enn við störf. Sá sem hlaut alvarlegustu meiðslin fékk gangstéttarhellu í höfuðið og var fluttur meðvitundarlaus á slysadeild. Samkvæmt upplýsingum Morgunblaðsins er hann allur að koma til þó að hann sé ekki orðinn algóður, um ári eftir að árásin var gerð. Ekki er endanlega ljóst hvert tjón hans verður.

  Eitt árásarmálið er komið til ríkissaksóknara en það snýst um innrás sem gerð var í Alþingishúsið en lögreglumanni á sjötugsaldri og þingvörðum tókst að hrinda henni við illan leik. Stutt er í að niðurstaða fáist í málið en ekki liggur fyrir hvort því lýkur með ákæru.

  • Einn lögreglumaður hlaut varanlega örorku
  • Ekki orðinn góður, ári eftir að árásin var gerð
  • Innrásartilraun í Alþingishúsið hjá saksóknara

Þá er ennfremur í sama blaði, bls. 2, greinin Harðlega gagnrýnd fyrir framgöngu við mótmæli, og er þar átt við Álfheiði Ingadóttur, þáverandi þingmann, sem nýlega tók við starfi heilbrigðisráðherra og jafnan kölluð 'hæstvirt' úr ræðustóli Alþingis. Greinin sú er vægast sagt afar merkilegur lestur!

Níu lögreglumenn krefjast bóta

Nefnd sem vinnur gegn stefnu þjóðar

Þetta er þarfleysunefnd, þetta er nefnd ýmissa andstæðinga fullveldis og löggjafarréttinda okkar samkvæmt stjórnarskránni, auk nokkurra annarra (vonandi verður Björg Thorarensen staðföst á réttindum landsins og andvíg bullinu). Það á strax að draga til baka þessa ólöglegu samþykkt um að sækja um innlimun í erlent stórveldi. Nefndarmenn, farið heim, en þið sem viljið koma á okkur klafa erlends stórveldis, snáfið þangað og komið ekki aftur.

Fyrsti fundur ESB-nefndar

Vitlaust bandarískt réttarfar

2077 milljónir króna fá erfingjar konu, sem fór sjálfviljug í vatnsdrykkjukeppni, í bætur fyrir líf hennar, en hún drap sig á tiltækinu. Geta dómar orðið vitlausari? Eða var líf þessarar konu svo miklu meira virði en þess fólks sem deyr úr hungri án þess að menn aðhafist neitt? Og var ekki eðlilegt að eitthvað af áhættunni væri hennar megin? Var hún sjálf kannski ennþá meira virði, svo sem fimm milljarða, og eigináhættan talin upp á tæpa þrjá? – Hvernig sem maður veltir þessu fyrir sér, er það eins vitlaust og það getur verið.

Verð með mitt reglulega föstudagserindi í Útvarpi Sögu kl. 12.40–13.00 í dag.

Tveir milljarðar króna í bætur

20 millur handa séra Gunnari; margir hefðu fengið að vinna í 3 mánuði og engin laun umfram það

Vísir.is gerir ráð fyrir, að séra Gunnar Björnsson fái 15,5 milljónir í starfslokasamning, en Rúv og Mbl.is rúmar 20 milljónir. Síðarnefndu fjölmiðlarnir fara örugglega með réttara mál, því að Vísir.is reiknar "aðeins" með 500.000 kr. í mánaðarlaun hjá honum (x 31 mánuður). En þau eru mun hærri hjá öllum Þjóðkirkjuprestum á Gunnars aldri.

Setja ætti lög, sem setja háttsettum embættismönnum stólinn fyrir dyrnar með svona bruðl. Eða er Gunnar eitt aðal-fórnarlamb landsins? Og hefur hann verið launalaus þau tvö ár, sem hann hefur verið frá starfi vegna vandræðamálsins á Selfossi? Ef ekki, er þá ekki verið að bjóða öðrum upp á óvenju-auðfarna leið til að hagnast?!

Menn, sem lenda í 100% örorku vegna vinnuslyss, jafnvel ófullveðja erfingjar myrtra manna, fá ekkert í líkingu við þessar 20 millur hans Gunnars. Nú þarf hann að taka evangelíska ákvörðun, með fullri hliðsjón af meðbræðrum sínum í þessu þjóðfélagi sem stefnir beint í skuldadíkið undir einbeittri stjórn Steingríms og Jóhönnu.

Gunnari boðinn starfslokasamningur