"Lýðræðisvaktin" og stærsta synd stjórnlagaráðs

Ný flokksnefna er stofnuð til stuðnings stjórnarskrárstefnu evrókratans Þorvaldar Gylfasonar og þar með hræbillegri fullveldisframsalsheimild 111. greinar "ráðsins" í þágu ESB. 

Hugleiðum framkomnar staðreyndir um valdastefnu ESB gagnvart okkur, í kjölfar yfirgangs þess við okkur í Icesave-málinu og vegna makrílveiða okkar:

Össur Skarphéðinsson sagði á þingi nýlega, að Evrópusambandið væri orðið "leitt" á þessum EES-samningi og "hundleitt" á tvíhliða samningnum við Sviss -- viðmælendur hans þar bendi þessum þjóðum frekar á að ganga bara í ESB.

Þannig er það enn einu sinni ljóst, að það er vilji ráðamanna í Brussel að koma Íslandi inn í Evrópusambandið, eins og raunar hafði löngu áður komið fram í ræðu og riti hjá þýzkum, frönskum, brezkum og spænskum ráðamönnum (atkvæðavægi þeirra í hinu löggefandi ráðherraráði og í leiðtogaráði ESB verður frá 1. nóv. 2014 50,79%!).

Einn stofnandi "Lýðræðisvaktarinnar", Pétur Gunnlaugsson, segir á útvarpsstöð sinni, Sögu, að morgni þessa 18. febr. 2013: "... þannig að við verðum að hafa bindandi þjóðaratkvæðagreiðslu ef við viljum hafa framsal ríkisvalds."

En hvað er "framsal ríkisvalds"? Þetta er allt of sakleysislegt hugtak yfir það að afsala héðan til Evrópusambandsins æðsta og ráðandi löggjafarvaldi, æðsta dómsvaldi og æðsta stjórnvaldi, t.d. í okkar sjávarútvegsmálum. Að tala bara um "framsal ríkisvalds", t.d. í kosningu um þetta, er þess vegna sakleysislega blekkjandi um það sem í raun skiptir okkur mestu: þ.e. að ráða sjálf þessu landi -- einungis í krafti þess fullveldis gátum við eignazt okkar 200 mílna landhelgi. Þetta, öll þessi æðstu yfirráð, er það sem verið er að tala um að framselja með "framsali ríkisvalds"!

En hvað segir maður sem er trúr lýðveldinu? Hvað segja hlustendur Péturs og lesendur hér í hjarta sínu við þessu: Þegar nær 1600 sinnum stærra stórveldi sækir á að eignast Ísland, eins og Össur er nánast búinn að viðurkenna, og beitir til þess hundruðum milljóna króna í áróður og þúsundum milljóna í mútustyrki, "VERÐUM" við þá, "VERÐUM" við þá að hafa bindandi þjóðaratkvæðagreiðslu þar sem hægt er að framselja því stórveldi öll okkar æðstu þjóðarréttindi í einu vetfangi? -- og þess vegna með eins atkvæðis meirihluta frekar en ekki?!

Af hverju "VERÐUM" við í þessu litla lýðveldi að hafa það þannig, í stað þess að setja hér ákvæði um aukinn meirihluta, sem til þess þurfi? Þannig var um Sambandslögin 1918: þar voru skilmálar um 75% meirihluta til að segja upp sambandinu við Dani.

Af hverju vilja menn eins og Pétur taka þessa áhættu, af hverju vill hann ekki gera kröfu um aukinn meirihuta í þessu máli, og af hverju svarar hann hlustendum sínum með þeim falsrökum, að menn þurfi á þessu fullveldisframsalsákvæði stjórnlagaráðs að halda, af því að núverandi stjórnarskrá leyfi Alþingi að fara með okkur inn í ESB? En það er alrangt, því að 2. grein hennar kveður á um, að beint og formlegt löggjafarvald skuli vera í höndum Alþingis og forsetans. En innan Evrópusambandsins værum við komin með tvö önnur löggjafarþing yfir okkur (ráðherraráðið og ESB-þingið), og lög þaðan færu ALDREI í gegnum þingsali Alþingis og ALDREI um hendur forseta lýðveldisins, heldur yrðu samstundis að lögum hér á landi. Og eins og það væri ekki miklu meira en ofrausn, þá myndu þau þar að auki ryðja frá öllum lagaákvæðum í löggjöf Alþingis, sem teldust stangast á við ESB-lagaverkið!

En þetta er nú einu sinni stefna þess manns, sem í gær var kynntur í fjölmiðlum sem "formaður Lýðræðisvaktarinnar", en í dag sem "vaktstjóri" hennar, en sá er Þorvaldur Gylfason, ESB-maður og hefur lengi verið. Maður óskar ekki slíkum fararheilla í slíka örlagareisu.

Lýðræðisvaktin stofnuð formlega

Athugasemdir

[Helga Kristjánsdóttir, 18.2.2013 kl. 13:41]

Einkennileg er vor rulla, í þessu jarðlífi,annað hvert er það drulla,eða harðlíf. Nú hafa svarnir andstæðingar ,orðið samherjar,en læt það liggja milli hluta.

[Helga Kristjánsdóttir, 18.2.2013 kl. 14:05]

Þarna tókst mér að sjást yfir i-ið í efri málsgrein. Þú ert ómetanlegur í baráttu þinni gegn ,fullveldisframsals-sinnum. Fólk mætti þakka þér fyrir.