Ó, hvað ef Svíþjóðardemókratar vinna stórsigur 9. september?

Enn eru vinstri mennirnir og múslima­vin­irn­ir Ævar Kjartans­son og Jón Ormur Hall­dórs­son að nota Rásar 1-þátt sinn "Samtal" til að fá til sín marg­nota mann af vinstri vængnum til að mata þjóðina um alþjóðamál.

"Ýmsar blikur eru á lofti um þessar mundir í alþjóðamálum," segja þeir og kjósa að ræða við Eirík Bergmann prófessor við háskólann á Bifröst, vitaskuld, hann er á þeirra bandi í vinstri­sinnaða pólitíska "rétt­trún­aðinum". 

Nú snýst málið um að koma svörtum bletti á Svíþjóðar­demó­krata og láta sem þeir séu öfgaflokkur, jafnvel miklu lengra til hægri en Danski þjóðarflokkurinn hennar Piu Kjærsgaard. Það var reynar óvænt að fá meðmæli með síðarnefnda flokknum á Rúv, eftir allt níðið um Piu meðal vinstri manna hér á landi. En það er rangt hjá Eiríki, að Svíþjóðar­demó­kratar hafi ekki gert sitt til að hreinsa út gömul nýfasistísk element úr flokknum. Það hafa þeir gert rétt eins og Pia og einnig Marine Le Pen í Frakklandi.

Svo spyr Jón Ormur hann, hvað almenningur (kjósendur) óttist, og þá verður "fræðimanninum" tregt um svör. "Ja, stundum óttast það óttann," segir hann, stundum engin ástæða til o.s.frv., og samt var það einmitt að koma í ljós nú í liðinni viku, sem marga hafði grunað, að stjórnvöld höfðu gegnum stofnun sína BRÅ beitt þöggun um uppruna þeirra glæpamanna sem eiga stóran þátt í verulegri aukningu glæpa í Svíþjóð á síðustu árum! "Það er auðveldara að óttast arabann heldur en Apple!" var meðal spekiorða Eiríks í þessu sambandi. Og hann þykist ekki viss um að það sé til svar við þessari spurningu, hvað fólkið óttist!!

Jón Ormur telur að fjölmiðlar ýti undir viðbrögð af þessu tagi (en í Svíþjóð höfðu þeir einmitt lengi tekið þátt í þöggun sósíaldemókrata um alvöru málsins í múslimabyggðum landsins) og fer svo að ræða samsæris­kenningar!

Þeir eru einstaklega samstilltir þessir kumpánar í því að ganga blindaðir um sviðið. Jón Ormur segir það sé "algerlega rangt!" að það séu vaxandi glæpir í Evrópu, "t.d. í Þýzkalandi og Svíþjóð". Samt er þetta alveg á hreinu um Svíþjóð, eins og nú er komið í ljós! Menn geta lesið um það virkilega fróðlega grein á Eyjunni/DV síðan í gær, þar sem fram kemur hátt hlutfall útlenzkra gerenda í alvarlegustu sakamálum Svíþjóðar. Vitaskuld þarf að upplýsa um gerendur í þeim málum og láta af allri meðvirkni með þjóðfélags­hópum sem reynast mun síður löghlýðnir en Svíar hafa verið fram undir þetta.

Hér eru dæmi úr grein Kristjáns Kristjánssonar, blaðamanns DV, Sænskir kjósendur óöruggir, um óvæntar (eða kannski ekki svo óvæntar) niðurstöður í rannsókn þriggja sænskra dagblaða um málin, eftir að menn þar voru orðnir þreyttir á þagmælslu opinberrar skráningarstofu (BRÅ) um málin:

"... [F]rá 2005 hefur ekki verið safnað gögnum um hverjir fremja afbrot, hvort það eru innfæddir eða innflytjendur eða afkomendur þeirra. Sænskir fjölmiðlar, þá helst Dagens Nyheter, Expressen og Aftonbladet, hafa því tekið að sér að kafa ofan í refsidóma til að geta skýrt frá hverjir fremja afbrotin.

Dagens Nyheter fór til dæmis yfir mál 47 grunaðra og 53 sakfelldra fyrir morð og morðtilraunir með skotvopnum, allt mál sem komu fyrir dómstóla. Niðurstaðan var að annað foreldri gerendanna, hið minnsta, var útlent. Helmingur þeirra fæddist utan Svíþjóðar. Flestar fjölskyldurnar voru frá Norður-Afríku eða Mið-Austur­löndum.

Í maí birti Aftonbladet umfjöllun um hópnauðganir. Farið var í gegnum 58 mál frá 2012 en 112 höfðu verið sakfelldir í þeim. Niðurstaðan var að gerendurnir voru yfirleitt ungir, undir áhrifum vímuefna og þekktu fórnarlambið. En það sem vakti mesta athygli og umtal var að tæplega þrír af hverjum fjórum voru fæddir utan Evrópu.

Í kjölfar umfjöllunar Aftonbladets í maí um gerendur í hópnauðgunarmálum kröfðust margir stjórnmálaflokkar þess að BRÅ myndi aftur byrja að skrá afbrot innflytjenda sérstaklega. BRÅ ætlar að verða við þessu og hefja slíkar skráningar á næsta ári ..."

Og hvernig var upphaf greinarinnar á Eyjunni/DV? Svona:

"Á aðeins sjö árum hefur morðum, frömdum með skotvopnum, fjölgað um 120 prósent í Svíþjóð. Þá hefur bílbrunum, skot­árás­um og hópnauðgunum fjölgað undanfarin misseri. Því er ekki að undra þótt lög og regla í samfélaginu séu eitt heitasta málið í kosninga­baráttunni en Svíar kjósa til þings þann 9. september. Í nýjustu könnun sænska forvarnar­ráðsins, BRÅ, kemur fram að 30 prósent kvenna og 19 prósent allra íbúa landsins finna til óöryggis þegar þeir fara út að kvöldlagi, hlutfallið hefur hækkað jafnt og þétt síðan 2013. Um 38 prósent Svía telja að „mikil“ fjölgun hafi orðið á afbrotum á undanförnum þremur árum. Um 29 prósent eru „mjög óróleg“ vegna afbrotatíðninnar.

Erfitt er að horfast ekki í augu við staðreyndir í málaflokknum því tölfræðin sýnir að þróunin hefur verið neikvæð. Almenningur er meðvitaður um að Svíar standa frammi fyrir stóru samfélagslegu vandamáli sem ekki hefur tekist að leysa þrátt fyrir ýmsar aðgerðir."

Svo standa þessir blinduðu menn, Jón Ormur, Ævar og Eiríkur, hjá og fara með háðsglósur sínar um það, að almenningur átti sig varla á raunveruleikanum vegna meintrar múgsefjunar og áróðurs í fjölmiðlum -- þeir þykjast vita miklu betur en Svíar sjálfir um ástandið í landi þeirra og áhrifin af stórfjölgun framandi þjóðarbrota þar úr Mið-Austurlöndum og Norður-Afríku!

Mikið held ég að þeim bregði við að lesa kosninga­tölurnar í Svíþjóð 9. næsta mánaðar! Svíþjóðar­demó­krötum er spáð á milli 25 og 30% fylgi, myndu þá velta sósíal­demókrötum af stóli sem stærsta flokknum! En halda einhverjir nema Rúvarar og meðhaldsmenn þeirra, að það eigi sér ekki eðlilegar ástæður? Svíar hafa fengið upp í kok af þöggun sinna stjórnvalda!

Athugasemdir

[Björn S Stefánsson, 19.8.2018 kl. 17:11]

Danski þjóðarflokkurinn hennar Piu Kjærsgaard, segir þú. Íslenskt mál mundi frekar vera Alþýðuflokkur Danmerkur.

[Jón Valur Jensson, 19.8.2018 kl. 17:17]

Þakka þér, Björn, þessa góðu ábendingu.

[Gústaf Adolf Skúlason, 20.8.2018 kl. 06:48]

Sæll Jón og þakkir fyrir skrifin. Sænskir sósíaldemókratar eru á harðahlaupum fram yfir hengiflugið og munu fá sögulegann skell í þessum kosningum. Ég þekki marga sem kjósa Móderata til sveitarfélaga og léna en ætla að kjósa Svíþjóðardemókrata til Riksdagen til að hrista upp í kerfinu. Margir eru orðnir langþreyttir á þöggun yfirvalda um glæpamenn. T.d. vildu yfirvöld ekki gefa upp hverjir þeir handteknu voru sem stóðu að bílabrunum síðustu helgar en netmiðlar hafa grafið fram að um fyrrum dæmda glæpamenn/innflytjendur er að ræða. Dagblað í vestur Svíþjóð hefur kært þöggun dómstólsins um nöfn og þjóðerni og verður fróðlegt að sjá hvað kemur út úr því. Vonandi apa Íslendingar ekki allt það versta frá Svíum. kkv