Óvinsæl ríkisstjórn öðrum fremur á hveiti­brauðs­dögum ... Þó keyrt áfram á illa þokkað áfengismál

Gríðarleg óánægja verður það að teljast að njóta aðeins 24,5% fylgis og þó með svona "ferska" ráðherra! Nýr Þjóðar­púls Gallup sýnir aðeins fjórða hvern ánægð­an með stjórn­ar­sam­starf Sjálf­stæð­is­flokks, Við­reisn­ar og Bjartr­ar fram­tíðar.

Ánægjunni er hins vegar mjög misskipt eftir flokkum. Tveir af hverjum þremur þeirra sem kusu Sjálf­stæðis­flokkinn í haust eru ánægðir, tæp fjörutíu prósent kjósenda Viðreisnar en einungis 14 prósent þeirra sem kusu Bjarta framtíð.

Kjósendur annarra flokka eru flestir mjög óánægðir, eitt til sex prósent þeirra eru ánægðir með stjórnina. (Ruv.is)

Þá er þetta mjög eftirtektarvert:

Marktækur munur er eftir kynjum, hversu kjósendur eru lukkulegir með stjórnina, 30 prósent karla eru ánægð með hana, en einungis 19 prósent kvenna.

En einnig þetta, sem sýnir hvernig frjáls­hyggjan og tengsl ráðherra við einka­væðingar-ævintýri fyrr og síðar (að ógleymdum skulda­niður­fell­ingum) gengur í fólk eftir stéttum og tekjum:

Tekjuhæsti hópurinn er ánægðastur, rúmur þriðjungur hans er ánægður með stjórnina, en 13 - 21 prósent hinna tekjulægstu eru ánægð. (Ruv.is)

Eigum við svo að skoða afstöðu fólks í því máli sem mest er einkenn­andi fyrir frjálshyggju- og einkavæðingar-brölltið á þeim hægri flokkum sem nú fara með völd?

Skoðanakannanir sýna nú YFIRGNÆFANDI MEIRIHLUTA ÍSLENDINGA ANDVÍGA ÁFENGIS-FRUMVARPINU (enda er vitað, að það mun auka hér áfengissölu um ca. 40%). Í könnun Zenter-rannsókna sem 1.023 tóku þátt í, 9.-14. febr., reyndust 61,5% alfarið mótfallnir nýju áfengis­frumvarpi, en aðeins 22,8% svarenda segjast vera hlynntir og 15,7% mjög hlynntir því að fá áfengi í búðir.

Í könnun DV, sem staðið hefur yfir, voru í fyrradag 69% andvígir frumvarpinu, en aðeins 30,1% hlynntir því, en nú hafa þeir, sem kannski eiga hér hagsmuna að gæta, trúlega reynt að sækja í sig veðrið og efla sinn hag í þeirri könnun, enda sárir mjög frá Zenter-könnuninni, og eru nú komnir upp í 44,1% fylgi með frumvarpinu, en 55,8% eru á móti því.

Ráðamenn, takið mark á þjóðinni og haldið aftur af ykkar ábyrgðar­lausa frjáls­hyggjuliði!!

Fjórðungur sáttur við stjórnina

Páll Magnússon stígur fram svo að eftir er tekið ...

Sérdeilis ánægjulegt er að þessi fyrrverandi útvarpsstjóri ætlar ekki að láta ráðherra komast upp með neitt rugl og múður vegna sjómannaverkfallsins. Bjarni Ben. og Þorgerður Katrín verða að lúta í lægra haldi með þvermóðsku sína strax á morgun, og væntanlega komast skipin þá úr höfn fyrir miðnættið, rétt í tæka tíð til að bjarga því sem bjargað verður af loðnuvertíðinni.

Sjálfstæðisflokkurinn og hinn óvani, ódæli flokkur atvinnurekenda, Viðreisn, þurfa að læra þá lexíu af þessu að láta þjóðarhag ráða, ekki eigin ímyndaða trúfesti við einhver illa ráðin princíp sem svo engin eru í reynd, eins og Bjarni verður að viðurkenna vegna fyrri aðgerða sinna í málinu á liðnu ári (eins og Páll benti á), "princíp" sem ljóslega verða að engu, nema þá helzt að andstæðu sinni, þegar Páll hefur rakið þetta snilldarlega í Kastljósþætti kvöldsins.

Þorgerður Katrín má þakka fyrir að komast í gegnum þetta mál án þess að missa ráðherrastólinn, en ekki er útséð um það ennþá. Ekki góð byrjun á endurkomu hennar í pólitík. 

Hitt er hrósefni fyrir Pál, hve snarpur og snjall hann reyndist í þættinum í kvöld og er þó jafnvel ekki búinn að halda sína jómfrúrræðu á Alþingi! En haldin verður hún á morgun, og þá munu margir leggja við eyrun.

Sjá nánar hér: http://www.ruv.is/frett/aetlar-i-hart-vid-radherra-vegna-sjomannadeilu

„Samningur kominn okkar á milli“

Þessa grein Gunnars verða allir að lesa! Ófært hvernig Þorgerður Katrín hagar sér

"Þorgerðar­hnútur" verður sögu­lega tal­inn "á pari við" Gord­íons­hnút­inn marg­fræga sem Alex­ander mikli leysti með sverðs­höggi. Ás­mund­ur Frið­riks­son hefur lausn­ina.*

En þessa grein Gunna­rs Heið­ars­sonar frá í morgun verða allir áhuga­menn um lausn sjómannaverkfallsins að lesa:

Meðvituð eða ómeðvituð fáviska ráðherra

(og hefst þannig: Framkoma sjávarútvegsráðherra minnir mjög á framkomu nýkjörins forseta Bandaríkjanna ...). Gunnar er frábærlega snjall í skrifum sinum; ég mæli með honum öðrum fremur, að menn sleppi því ekki að lesa pistlana hans, vel hugsaða og rökstudda.

PS. Ekki kemur á óvart að fréttastofa RÚV kallar gamlan vin sinn, Icesave- og Jóhönnustjórnar-jarðýtuna Indriða H. Þorláksson, til vitnisburðar gegn sjómönnum í hádegisfréttum í dag! Sem sé: Tíðindalaust af Efstaleitis-vígstöðvunum!

* Ásmundur þingmaður Friðriksson er ekki haldinn sömu þrjózkunni og formaður hans Bjarni Ben. og Þorgerður Katrín gagnvart sjómönnum, sjá tengilinn á frétt Mbl.is hér fyrir neðan.

„Höfum daginn til að klára þetta“

Engin allsherjaruppgjöf enn hjá anglíkönum

Ánægjulegt er, að ekki tókst að keyra í gegn sam­þykkt á sýnódu brezku biskupa­kirkj­unnar um að lina af­stöðu hennar gagn­vart sam­kynja sam­búð/hjóna­bandi. Kristn­ir menn eiga að standa trú­an vörð um kenn­ingu Nýja testa­ment­is­ins um þessi mál, ólíkt því sem Þjóð­kirkjan ís­lenzka hefur hafzt að og fá­einar kirkj­ur aðrar erlendis, ótrúar orðum Krists um hjóna­bandið (Mt. 19, Mk. 10, sbr. einnig kenningu postulanna).

PS. Og Mbl.is vísar einungis í frétt vinstra­blaðsins Guardians! Af hverju ekki Daily Telegraph eða The Times of London? Eru vinstri- og róttækt "frjálslyndir" starfsmenn Guardians og BBC orðnir leiðarhnoð og mælisnúra fréttamanna Morgunblaðsins? Dæmi um það, hve leiðsögn BBC brást þeim illilega, sést af því, að síðast í gær var Mbl.is að treysta a fullyrðingu á vef BBC þess efnis, að engin fylgni (correlation) hefði fundizt staðfest í rannsóknum milli brjóstakrabba og fyrri fóstureyðinga, en þetta afsannast allt á þessari vefslóð, sem sýndi yfirgnæfandi fjölda rannsókna sem staðfestu slíka fylgni og í um 2. hverju tilviki tölfræðilega umtalsverða fylgni (í 37 af 77 rannsóknum). Og ég þakka Þorsteini Siglaugssyni hagfræðingi, góðum sjálfstæðismanni, fyrir ábendinguna sem þar var komið á framfæri.

Væri nú heillaráð fyrir Mbl.is að birta leiðréttingarfrétt þessa efnis.

Höfnuðu biskupaskýrslu um samkynhneigð

Þetta er Hneyksli með stóru H-i

4,7 milljarða ætlar Borgun að hirða í arð á þessu ári. Valdamenn í ríkisstjórn og frændur þeirra högnuðust svo, að kaupin gerspilltu á Borgun hafa borgað sig upp á tveimur árum! Ríkisstjórnin á að segja af sér, þessa vegna og vegna viljaleysis til að leysa sjómannadeiluna og fara með því á mis við hundraða eða milljarða gjaldeyris- og skatttekjur ríkissjóðs!

Leggja til 4,7 milljarða arð

Meghan er firnasæt og Harry alveg harðákveðinn

Hér væri vitaskuld við hæfi að minna á eldri kveðskap um Meghan og Harry, en hann kunni enginn að meta, það var svo sem eftir ykkur, lesendur! Og þá verður bara að byrja á nýjum brag eftir efninu:

Hún meiri háttar er mær,

hún Meghan, með augun skær,

en eitthvað virðist þó lúpuleg,

er lætur hann teyma sig myrkan um veg,    (sjá aðra mynd í fréttinni)

hann Harry -- í hnappeldu leidd? --

En þá er að njóta sín nú með þeim

nánustu vinkonum, halda í geim

í Nýju-Jórvík, ein úti´ í heim´ ...

og vonandi aldrei af öðrum seidd

yngismanni. Þá lendir hún sæl

sem hertogaynja með ofurstæl

og slær þá við öllum úti á lífinu,

ástfanginn Harry það bætir upp vífinu:

og kórónu hlýtur þá hún,

er Harry dregur þar fánann að hún

á Buckingham Palace og enga sér Alice,

er ögrandi stökk þar um tún.

 

Svo undarlega óstýrilátur kveðskapur verður til nóttina eftir Valentínusardag.

Þarf ekki karl til að fagna Valentínusardeginum

Mikið höfðu menn við, hrönnuðust í mengandi flugvélar til Parísar, en hafa svo engan "árangur" til 2030!

Þótt sannarlega sé nauð­synlegt að minnka sem mest mengun í okkar landi eins og öðrum, m.a. frá Hellis­heiðar­virkjun og kísil­málm­verksmiðju United Silicon við Kefla­vík, hef ég enga trú á gróður­húsa­loft­tegunda-theor­íunni sem Parísar­ráðstefnan vildi án full­gildra sannana gera að nánast skyldu­boði fyrir allar ríkis­stjórnir.

Ég tek í loftslags­málum mark á vel rökstuddri hrakn­ingu trúar­kenn­ingar þess­arar, þ.e. á rökum tveggja stórvel gefinna verk­fræðinga, Friðriks Daníels­sonar og Lofts Altice Þorsteins­sonar. Menn geta lesið rök Friðriks í bók hans Ísland er land þitt, þar sem ýmsar greinar fjalla um þessi mál af mikilli glögg­skyggni. Loftur ritar um málið á Moggablogg Samstöðu þjóðar, á Facebók sína og víðar.

Munu ekki uppfylla Parísarsáttmálann

Einn brautryðjandi í "ethnic cleansing" var Margaret Sanger, stofnandi Planned Parenthood

Adoption: the loving option, ættleiðing er val kærleikans - vel valin einkunnarorð lífsverndarsinna sem komu saman í 45 borgum Bandaríkjanna og andæfðu fjárstuðningi við rasískt mótíverað milljarðabatterí: Planned Parenthood. Stofnanda þess, Margaret Sanger (1883-1966), var meinilla við fjölgun fólks frá Puerto Rico og þeldökkra manna, enda sjálf undir áhrifum af mannkynbóta­stefnunni (eugenicism) og þýzkri hugmyndafræði (Nietzsche og mannkynbóta­manna) og var í bréfa­sambandi við nazista. Fóstur­deyðingar og vananir fólks af "lituðum" kynstofnum, sem og dreifing getnaðar­varna til þeirra og annarra fátækra öðrum fremur, voru meðul sem hún taldi eðlilegt að beita í sinni baráttu, sem mótaðist af trúnni á yfirburði hvíta kynþáttarins. Fræg voru vígorð hennar: "More children from the fit. less from the unfit -- that is the chief aim of birth control" og: Birth Control: to create a race of thoroughbreds".

Og nú löngu seinna er Planned Parenthhod International orðið voldugt fyrirtæki á alþjóðavettvangi og á sér jafnvel útibú á Íslandi. En lífsverndarsinnar í Bandaríkjunum þekkja vel til stórfelldrar fósturdeyðingastarfsemi þessa risafyrirtækis, sem notið hefur stuðnings stjórnmálamanna og leitað eftir og fengið, með hjálp manna eins og Bills Clinton og Obama, ómæld framlög úr sjóðum alríkisins.

En nú er það sannarlega von lífsverndarsinna þar vestra, að alveg takist að skrúfa fyrir sjóðstreymi af fé skattborgara til skaðræðisstarfsemi Planned Parenthood gegn ófæddum börnum. Heitstrengingar hins nýja forseta í því efni gefa þar vissulega tilefni til mikilla vona.

PS. Vek svo athygli á þessari grein: 

Marine Le Pen: AFEITRAÐI frönsku Þjóðfylkinguna, hafnar öfgum og kynþáttahatri.

Mótmæltu fóstureyðingum í 45 ríkjum

Brussel-valdaklíkan fær eitthvað fyrir hjartað að hugsa um Trump!

  Hlálegt er, þó ekki laust við að vera ískyggilegt, að Federica Mog­her­ini, ut­an­rík­isráðfrú Evr­ópu­sam­bands­ins, varar bandarísk stjórn­völd við því að skipta sér af evr­ópsk­um stjórn­mál­um, eftir að hver leiðtogi Evrópuþjóða á fætur öðrum hefur bætzt í hóp aðhrópsmanna hins nýja forseta, Donalds Trump.

Hún nefndi ekki dæmi um af­skipti Banda­ríkj­anna en sagðist stund­um heyra radd­ir í nýju rík­is­stjórn­inni segja að Evr­ópu­sam­bandið væri „ekki endi­lega góð hug­mynd...“ (Mbl.is)

Þetta er nú bara einföld staðreynd, sem menn koma léttilega auga á yfir endilangt Atlantshafið!

„... Að bjóða okk­ur að rífa það niður sem okk­ur hef­ur tek­ist að byggja upp og hef­ur fært okk­ur ekki bara frið held­ur efna­hagsleg­an styrk,“ sagði hún.

Friðaráhrif Evr­ópu­sam­bandsins eru engin, nema hún sé að gefa í skyn, að þjóðirnar í ESB séu æstar í að ráðast hver á aðra.

„Það er ekki mitt eða ann­ars Evr­ópu­búa að tjá sig um póli­tískt val eða ákvarð­anir inn­an­lands í Banda­ríkj­un­um. Það sama á við um Evr­ópu; eng­in af­skipti,“ sagði Mog­her­ini.

Er það ekki seint í rassinn gripið að tala svona eftir allan niðrandi skætinginn í garð Trumps og hans flokks? Ætlar Mogherini kannski að múlbinda evrópska leiðtoga vegna ótta við að Trump taki ekki móðgunum þeirra með því að yppta öxlum? Eða er þessi yfirlýsing hennar einfaldlega áminning raunsæisins, að Evr­ópu­sam­bandið standi ákaflega illa nú um stundir? Brexit er að verða að veru­leika og Frexit jafnvel hugsanlegt á næstunni, ef Marine Le Pen nær miklum árangri í forsetakosningunum.

Don­ald Tusk, for­seti leiðtogaráðs Evr­ópu­sam­bands­ins, seg­ir ný stjórn­völd vest­an­hafs og yf­ir­lýs­ing­ar þeirra eina helstu ógn­ina sem steðjar að sam­band­inu. [!]

Þessir valdamenn kunna illa að meta hreinskilni Trumps:

Trump hef­ur verið iðinn við að gera lítið úr Evr­ópus­a­starf­inu og m.a. lofað úr­sögn Bret­lands. Þá dró hann upp þá mynd áður en hann tók embætti að Þjóðverj­ar sætu ein­ir við völd í Evr­ópu[sambandinu] og að Evr­ópu­sam­bandið væri við það að falla sund­ur.

Þjóðverjar ráða ekki einir í ESB, en hafa þar langmest völd og leiðandi.

Og þetta fer sannarlega fyrir brjóstið á Brussel-mönnum:

Ted Malloch, sem Trump hef­ur í huga að til­nefna sem sendi­full­trúa við Evr­ópu­sam­bandið, seg­ir for­set­ann telja væn­legra að eiga bein sam­skipti við ein­stök ríki frek­ar en Evr­ópu­sam­bandið. 

Þetta er aftur á móti ekki 100% kórrétt hjá nýja sendifulltrúanum:

Þá hef­ur Malloch sakað Evr­ópu­búa um að vera á móti Banda­ríkj­un­um.

Staðreynd er að minnsta kosti, að ný skoðanakönnun, reyndar gerð rétt áður en tilskipun Trumps var gefin út um lokun á aðgang borgara 7 ríkja að Banda­ríkj­un­um fram undir apríllok nk., leiddi í ljós, að áberandi meirihluti fólks í 10 af helztu Evrópuríkjum er hlynntur því að stöðva þar móttöku fleiri múslima. Með þessu eru Evrópubúar í reynd að taka harðari afstöðu en Trump með ferðabanni sínu, því að það á ekki að gilda lengur en næstu 75 dagana.

Mest finna þó ESB-leiðtogar sennilega til buddu sinnar, af því að Donald Trump hefur sett fram þá einörðu kröfu, að evrópsk NATO-ríki hætti að lifa sníkjulífi á Bandaríkjunum í varnarmálum sínum. Eðlilegt framlag þessara ríkja til sinna eigin varna er krafa hans. 

Ef fráleit tillaga hins nýja, hrösunargjarna formanns Samfylkingarinnar og sjö annarra vinstri manna um að fordæma bandarísk stjórnvöld nær einhverjum framgangi á Alþingi, þá megum við Íslendingar allt eins búast við kröfum frá Washington um milljarða fjárframlag til varna landsins. Kjósendur geta þá sent þessum vinstri flokkum reikninginn.

Varar Trump við afskiptum af Evrópu

Allt er nú til - Völvan styrkt um 300 þúsund krónur!

Undrun vekur frétt af styrk­veit­ingu hins villta-vinstra borg­ar­ráðs. En í reynd þarf þetta ekki að að koma á óvart, fremur að þetta sé bara ein af fyrir­sjáan­leg­um til­raun­um 101-liðs­ins til að eyða fé borgar­búa á fárán­lega fem­ín­istískan hátt. En um að gera: Ekki styðja Fjölskyldu­hjálpina og ekki Samhjálp Hvítasunnu­manna, heldur vinna gegn þeim, og ekki halda áfram að bregða fæti fyrir dreifingu Nýja testa­mentisins! Það verður að sjást, að menn séu trúlausir vinstri menn og femínistar, ekki satt?

Völvan styrkt um 300 þúsund krónur

Borgarráð samþykkti í gær ýmsar styrkveitingar. Meðal þeirra sem fengu styrk, upp á 300 þúsund krónur, var Völvan, sem er ekki spákona Vikunnar heldur vitundarvakning um málefni píkunnar.

Meira